Gérard Lemarquis og Les Métèques - Kvöldstund með Brassens  

Afslöppuð kvöldstund með einlægum Brassens-aðdáendum sem kynna átrúnaðargoðið sitt og syngja uppáhalds Brassens lögin sín í Hannesarholti fimmtudaginn 9.nóvember kl.20.

Georges Brassens er eitt dáðasta söngvaskáld Frakka og tónlist hans og textar eru órjúfanlegur hluti af franskri þjóðarsál. Brassens var fæddur 22. október 2021 og því eru 102 ár frá fæðingu hans um þessar mundir. Hann var mikill anarkisti og trúleysingi og klámfengnir textar hans ollu mikilli hneykslun hjá frönskum góðborgurum á síðustu öld.

Les Métèques: Ásta Ingibjartsdóttir (söngur), Eyjólfur Már Sigurðsson (söngur og gítar), Olivier Moschetta (söngur og bassi), Ragnar Skúlason (fiðla). Sögumaður er Gérard Lemarquis.

Gérard Lemarquis og Les Métèques - Kvöldstund með Brassens 

Bergþóra Einarsdóttir og Guðrún Hulda Pálsdóttir eru vinkonur og þúsundþjalasmiðir sem kynntust í ritlistarnámi í Háskóla Íslands. Þær eru útivinnandi einstæðar mæður á fertugsaldri og mynda auk þess hljómsveitina Silkikettina. Saga Silkikattanna nær aftur til ársins 2014 þegar Bergþóra var í Reykjavíkurdætrum og Guðrún að slá sína fyrstu strengi á kontrabassa. Bergþóra fór að þylja ljóðskotna texta yfir bassalínur Guðrúnar þeim til skemmtunar og fluttu þær sitt fyrsta lag við opnun Listhátíðar Reykjavíkur það sama ár. Fram til þessa hafa Silkikettirnir helst kosið að koma saman til að njóta og einstaka sinnum miðlað sínum dulbúna sannleika í heimahúsum en nú hefur hljómsveitin fullmótað sex laga EP plötu, Smurðar fórnir, og verður útgáfu hennar fagnað þann 27. október næstkomandi með tónleikum. Árið 2020 sömdu Silkikettirnir lagið „Andans dóttir“ við texta Hannesar Hafstein „Strikum yfir stóru orðin“ í lagakeppni Hannesarholts og hlutu sérstök innanhúsverðlaun - og er því við hæfi að fyrstu útgáfutónleikar þeirra fari fram í því sögufræga húsnæði. Kosturinn við dulbúning er að hann getur staðið fyrir margt og þolað breytingar. Þannig eru textarnir á Smurðum fórnum flestir meira en tíu ára gamlir en lögin hafa tekið breytingum, uppbygging þeirra fengið að fljóta og útfærslan þróast með tímanum. Yrkisefni laganna eru af tilvistarlegum toga og hafa á sér ævintýralegan blæ. Silkikettirnir hlutu nýliðastyrk frá STEF og Hljóðritunarstyrk frá Rannís og var fjármagnið notað við vinnslu plötunnar. Að vinnslu plötunnar komu, auk þeirra Guðrúnar og Bergþóru; Bjarni Þór Jensson (upptökur og hljóðblöndun), Daníel Auðunsson (upptökur, hljóðblöndun og ýmis rafhljóðfæri), Karl Pestka (víóla) og Magnús Trygvasen Eliassen (slagverk). Arnar Guðjónsson sá um upptökur á slagverki. Þeir Daníel og Karl munu koma fram ásamt Silkiköttunum en Sólrún Mjöll Kjartansdóttir mun sjá um slagverk.

Bergþóra Einarsdóttir and Guðrún Hulda Pálsdóttir are friends who met while studying creative writing at the University of Iceland. They are hard working single mothers in their forties and together they form the band Silk Cats.

The history of the Silk Cats dates back to 2014 when Bergthóra was in the band Daughters of Reykjavík and Guðrún was trying out playing the double bass for the first time. Bergþóra began to weave lyrical lyrics over Guðrún's bass lines for their own entertainment. Soon they performed their first song at the opening of the Reykjavík Arts Festival that same year.

Until now, the Silk Cats have preferred to get together to enjoy making music and occasionally share their hidden truths in house parties, but now the band has completed a six-track EP album, Smurðar fórnir (which can be translated as Anoined Sacrifices). They will celebrate the release with a concert October 27th.

In 2020, Silk Cats wrote the song "Andans dóttir" to the text of a poem by Hannes Hafsteins in Hannesarholt's song competition. For that the band received a special indoor award - and it is therefore appropriate that their first release concert takes place in that historic building.

The themes of the songs are of an existential nature and have an adventurous feel.

Most of the lyrics on the EP are more than ten years old, but the songs have changed, their structure has been allowed to float and the execution has developed over time.

In addition to Guðrún and Bergþóra, the album was worked on; Bjarni Þór Jensson (recordings and sound mixing), Daníel Auðunsson (recordings, sound mixing and various electronic instruments), Karl Pestka (viola) and Magnús Trygvasen Eliassen (percussion). Arnar Guðjónsson recorded the percussion.

Daníel and Karl will perform together with the Silk Cats, while Sólrún Mjöll Kjartansdóttir will take care of percussion.

Fiðluleikarinn Sara Su Jones og píanistinn Tatyana Stepanova bjóða til dúótónleika í Hannesarholti 13.október 2023 kl.19.30 í tilefni af sýningu Hans Jóhannsonar á afrakstri fjögurra áratuga fiðlusmíði. Einstök tóngæði fiðlunnar sem hann smíðaði fyrir Sara Su 2017 mun njóta sín vel í Hljóðbergi Hannesarholts, sem er rómað fyrir góðan hljómburð og nándina sem skapast milli flytjenda og áhorfenda. Enginn aðgangseyrir er á tónleikana, sem hefjast með stuttu spjalli fiðlusmiðsins um fiðluna sem hann smíðaði fyrir Sara Su. Allir velkomnir.

Sara Su og Tatyana hafa starfað saman síðastliðin fimmtán ár og leikið víðs vegar um Bandaríkin. Sara Su kemur frá Bandaríkjunum, en Tatyana er af Úkrainskum uppruna. Efnisskrá þeirra telur gjarnan lítt þekkt en einstök verk.

Sara Su Jones hefur verið nefnd sem "fiðluleikari með öfundsverða hæfileika" af gagnrýnanda Chicago Sun-Times. Hún hefur haldið tónleika í London, Lissabon og Reykjavík, auk Chicago sem er heimaborg hennar. Sara Su lauk gráðum í hagfræði og lögum frá Harvard háskóla, þar sem hún var aðstoðartónlistarstjóri sinfóníunnar. Hún starfaði sem diplómatalærlingur, ráðgjafi í stjórnun og lögfræðingur áður en hún stofnaði eigið fyrirtæki í menntageiranum. Sara Su leikur á fiðlu sem Hans Jóhannsson smíðaði fyrir hana árið 2017.

Tatyana Stepanova er eftirtektarverð tónlistarkona og kennari, lýst sem sannfærandi píanista af Chicago Tribune. Kiev er heimabær hennar og hún lauk námi frá Tchaiovsky og Rimsky-Korsakov ríkisháskólunum í Kiev og Sankti Pétursborg. Hún hefur leikið með félögum úr Sinfóníuhljómsveit Chicago og Lýrisku Óperu Chicago Hljómsveitarinnar. Tatyana kennir ungum listamönnum í Midwest og hefur verið meðleikari í Northwestern University. Hún er eftirsóttur kennari og kammertónlistarleiðbeinandi. Nemendur hennar og kammerhópar hafa unnið til verðlauna í tónlistarkeppnum víða um Bandaríkin. 

Efnisskrá:
Brahms: FAE Scherzo
Clara Schumann: Three Romances
Marguerite Canal: Sonata
Gwyneth Walker: Fantasy Etudes
Grigoras Dinicu: Hora Staccato

Dúótónleikar Sara Su Jones og Tatyana Stepanova

Kvöldstund með Roberto Luigi Pagani, miðaldafræðingi, höfundi, menningarmiðlara og leiðsögumanni með meiru, sem er einn þessara nýju íslendinga sem hefur sterk áhrif á samfélag sitt og ber með sér frískandi andblæ. Fimmtudagskvöldið 12.október kl.20 í Hljóðbergi Hannesarholts.

Kristborg Bóel Steindórsdóttir ræðir við Roberto sem hefur frá mörgu að segja, en Draumalandið sem hann nefnir svo er Ísland, sem hefur verið heimili hans í tíu ár. Hannn hefur gefið út bækur um íslenska menningu, þar á meðal þýðingar af fornsögum og sögulega ferðahandbók fyrir National Geographic. Hann situr í stjórn Ítalsk-íslenska viðskiptaráðsins og Ítalska félagsins á Íslandi. Sem menningarmiðlari kynnir Roberto Ísland fyrir Ítölum sem menningaráfangastað, þar sem hann vinnur á fordómum og ranghugmyndum um Ísland meðal landa sinna. 

Roberto bauðst að leika á flygilinn rómaða í Hljóðbergi, en hann kaus fremur að leika á langspilið sitt fyrir áhorfendur, þar sem hann telur Íslendinga vera búna að gleyma henni.

Verið öll velkomin að njóta kvöldstundar í Hannesarholti. 

Tíu ár í Draumalandinu - Kvöldstund með Roberto Luigi Pagani

Píanóleikarinn og tónskáldið Einar Bjartur Egilsson flytur lög af plötunni sinni Kyrrð ásamt Chrissie Telmu Guðmundsdóttur fiðluleikara og Hrafnhildi Mörtu Guðmundsdóttur sellóleikara. Breiðskífan Kyrrð kom út í fyrra og eru þetta síðbúnir útgáfutónleikar. Einnig verða leikin eldri verk Einars af plötunni Heimkoma.

Áheyrendur verða leiddir í ferðalag gegnum landslag tilfinninganna - frá auðum vegum sorgarinnar til mikilfenglegs útsýnis háfjallanna. Tónlistin er oft draumkennd en spannar vítt svið, allt frá hinu einfalda yfir í dramatíska hápunkta. Þótt ferðalagið sé oft strembið er vonin aldrei langt undan.

Einar Bjartur er virkur sem píanóleikari og meðleikari hérlendis, spilar reglulega með ýmsum listamönnum og kórum. Hann hefur einnig samið tónlist fyrir nokkrar stuttmyndir og gaf út breiðskífuna Heimkoma árið 2015 þegar hann bjó í Hollandi. Einnig hefur hann gefið út plötur með einleiksverkum fyrir píanó.

Systur stjórna fyrsta Syngjum saman þessa önnina, laugaradaginn 30.september kl.14 og er mikil tilhlökkun í húsi vegna þess. Við bjóðum þær hjartanlega velkomnar í samsöng í Hannesarholti í fyrsta sinn. Að sjálfsögðu er átt við systurnar sem komu fram fyrir Íslands hönd í Söngvakeppni Evrópskra sjónvarpsstöðva fyrir Íslands hönd 1922. Frítt inn og textar á tjaldi svo að allir geti sungið með.

Syngjum saman í Hannesarholti veturinn 2023-2024 er tileinkað Marinellu Ragnheiði Haraldsdóttur, sem var fædd 1933 og hefði því orðið níræð 14.september 2023. Hannesarholt er til vegna hennar og hún mætti á alla Syngjum saman viðburði með mér þar til heimsfaraldurinn truflaði taktinn. Um leið og við minnumst hennar og heiðrum, viljum við taka hana okkur til fyrirmyndar. Söngurinn fylgdi henni ævina út, þar til hún lést 11.júlí síðastliðinn. Frítt er inná Syngjum saman í minningu hennar í vetur, textar á tjaldi og allir geta sungið með. Allar kynslóðir velkomnar.

Systur eða Sigga, Beta og Elín eru Sigríður, Elísabet og Elín Eyþórsdætur. Þær byrjuðu aða skapa saman tónlist 2011 undir nafninu Sísý Ey og gáfu meðal annars út raftónlistarsmellinn Ain’t Got Nobody árið 2013 í samstarfi við DJ Oculus.

Árið 2022 unnu þær Söngvakeppni sjónvarpsins með þjóðlagakennda laginu Með hækkandi sól (sem Lay Low samdi) og kepptu fyrir Íslands hönd í Tórínó undir nafninu Systur.

Systurnar eru af tónlistarfjölskyldu, en foreldrar þeirra eru Ellen Kristjánsdóttir og Eyþór Gunnarsson. Móðurbróðir þeirra er KK.

Veitingahúsið í Hannesarholti er opið alla daga nema sunnudaga og mánudaga.

Syngjum saman í Hannesarholti með Systrum

Kvöldstund með Dr. Ólafi Þór Ævarssyni geðlækni, sem ræðir um nýtt hugtak sem útleggst á íslensku sem Samfélagsgæska,  Social Kindness á ensku. Hann segir meðal annars frá nýrri þekkingu á heilanum og samstarfi taugakerfis og hormóna, sem sýnir hve mikilvæg samvinna og gæska eru til að takast á við álag. September er mánuður geðræktar og hér eru á ferðinni góðar fréttir í geðrækt.

Auk þess að starfa sem geðlæknir er Ólafur stofnandi Streituskólans. Þessi fyrirlestur getur flokkast undir fræðslu til forvarna frá Streituskólanum. Ólafur er ósínkur á góð ráð og uppbyggjandi skilaboð til samborgaranna og skrifar meðal annars pistla á akureyri.net sem nefnast Fræðsla til forvarna. Í einum slíkum ræðir hann um samfélagsgæsku:

Þegar við verðum vitni að því að einhver gerir góðverk er tilfinningin sem við finnum sjálf góð. Okkur verður hlýtt um hjartarætur og fyllumst manngæsku og einnig löngun til að gera eins. Eða réttara sagt svipað. Rannsóknirnar sýna nefnilega að maður gerir ekki það sama og fyrirmyndin heldur fyllist meiri löngun til að gera vel, láta gott af sér leiða og finnur svo eigin leið til að gera það. Þetta er smitandi hegðun, meðvituð eða ómeðvituð. Vísindamenn hafa verið að rannsaka hegðun í stórum hópum í löngun til þess að skýra þetta fyrirbæri. 

Streymt verður frá kvöldstundinni og aðgangseyrir er valfrjáls. Skráning og miðasala á tix.is

SAMFÉLAGSGÆSKA í Hannesarholti með Dr. Ólafi Þór Ævarssyni

Margrét Jónsdóttir sýnir í Hannesarholti dagana 21.september - 11.október, verk úr myndröðinni IN MEMORIAM ásamt verkum úr myndröð sem spratt fram á tímum COVID. Þau verk eru unnin í Frakklandi og tengjast eldri verkum hennar, en hún slasaðist í Frakklandi og var strandaglópur í COVID. Öll verkin eru til sölu. Máluð mynd er miklu meira en bara máluð mynd, myndlistin snýst ekki bara um tækni, það verður líka að nema og skynja, sem kemur á undan því vitsmunalega til að geta notið listar. 

Margrét hefur alltaf unnið út frá hinum ýmsu víddum í náttúrunni, að gera það ósýnilega sýnilegt og fylgja innsæi og tilfinningum. Náttúruöflin eru sterk og eyðandi og stjórna líðan mannanna og veruleika með öllum sínum kröftum og ofbeldi en sömu lögmál virðist gilda á öllum sviðum tilverunnar. Verk Margrétar eru einhverskonar fórn til lífsins, því bæði menntun hennar og starf undanfarna hálfa öld sem listamaður hefur snúist um allt annað og miklu stærra en sölu, markað, markaðssetningu eða vinsældir. Þetta hafa verið viðbrögð við skynjun á einhverju sem er svo sterkt að lífið er lagt við í tjáningu sem vart verður skilin en numin sterkt, eitthvað handan lífs og allt um kring. Allt sem maðurinn gerir hverfur og þannig er það einnig með þessa fórn listamannsins:  maðurinn rotnar og verður að næringu fyrir næstu ögn, grotnar niður og hverfur í tómið. 

Listmálarinn Margrét Jónsdóttir er fædd í Reykjavík árið 1953 og starfar að list sinni í Frakklandi og Íslandi. Hún hefur unnið sem myndlistarmaður um hálfa öld en 48 ár eru frá fyrstu sýningu hennar í London. Hún nam við Myndlista og Handíðaskóla Íslands, diplóma í frjálsri myndlist/ grafík árið 1974. Masternám við Central Saint Martin’s College of Art í London árin 1974 til 1976. Myndlista og Handíðaskóla Íslands, diplóma í grafískri hönnun árið 1984. Diplóma frá Kennaraháskólanum árið 1997. Hún hefur haldið yfir 50 einkasýningar og tekið þátt í fjölda samsýninga hér á landi og erlendis. Margrét var einn af stofnendum Gallery Suðurgötu 7 sem var mikilvæg miðstöð í þróun framlínumyndlistar á Íslandi. Hennar er getið í ritinu „Íslensk listasaga“, sem er fimm binda verk og spannar tímabilið frá síðari hluta 19. aldar til upphafs 21. aldar. Einn af stofnendum Hagsmunafélags Myndlistarmanna sem var undanfari Sambands Íslenskra Myndlistarmanna ásamt stofnun SÍM. Verk eftir hana eru í eigu helstu listasafna landsins. Hefur hlotið ferðastyrki og starfslaun listamanna. Félagi í FÍM, Íslensk Grafík, SÍM, Nýlistasafninu. 

Margrét hlaut norræn vatnslitaverðlaun á þessu ári. The Winsor & Newton Prize. Verðlaun Norræna Vatnslitafélagsins/Col Art The Nordic Watercolor Association Prize 2023. 

Náttúra / Að vera - Margrét Jónsdóttir Málverkasýning

Halla Tómasdóttir segir frá nýútkominni bók sinni Hugrekki til að hafa áhrif á samverustund í Hannesarholti í hádeginu 9.september kl.11.30 í Hljóðbergi Hannesarholts og svarar spurningum gesta. Boðið er upp á hádegisverð í veitingastofum Hannesarholts ef fólk vill bóka borð í framhaldi af hádegisspjallinu í síma 511-1904. Enginn aðgangseyrir er að samverustundinni.

Hugrekki til að hafa áhrif er gefin út af Sölku forlagi og á vef forlagsins kemur eftirfarandi lýsing á bókinni: 

Það býr leiðtogi innra með okkur öllum og eitt mikilvægasta verkefni lífsins er að gefa þessum leiðtoga rödd og áhrif. Sannur leiðtogi leggur sig fram um að hafa áhrif til góðs og nýtir hugrekki sitt til að leysa úr læðingi eigin krafta sem og annarra.

Í bókinni Hugrekki til að hafa áhrif deilir Halla reynslu úr lífi og starfi sem og sögum af fyrirtækjum og fólki sem hafa virkjað krafta sína til góðra verka og þannig náð bæði miklum árangri og fundið innri gleði. Bókinni er ætlað að veita lesandanum innblástur til að bæta sig og sitt samfélag og í henni má finna fjölda góðra ráða, hvetjandi sögur, hugleiðingar og gagnlegar spurningar sem efla leiðtogann innra með okkur. 

„Ég hef þá einlægu trú að allar breytingar byrji með einni manneskju sem hefur hugrekki til að hafa áhrif og fær fleiri með sér í lið. Ég vona að þú finnir þinn stað, þinn málstað til að leiða breytingar til góðs og minni þig á að allar breytingar byrja með góðu fólki sem ákveður að starfa með öðru góðu fólki að því að gera heiminn eilítið betri í dag en í gær. Ef við veljum að taka þátt, gera gagn og láta gott af okkur leiða, þá eru í reynd okkar björtustu tímar fram undan.“

Halla Tómasdóttir er forstjóri B Team sem starfar á heimsvísu að því markmiði að leiða umbreytingu í viðskipta- og stjórnunarháttum í átt til betra samfélags. Þá hefur Halla unnið hjá stórfyrirtækjum á borð við Pepsi og M&M/Mars, tekið virkan þátt í uppbyggingu Háskólans í Reykjavík og leitt verkefnið Auður í krafti kvenna. Halla var annar stofnenda Auðar Capital, einn stofnenda Mauraþúfunnar sem hélt Þjóðfund árið 2009 og árið 2016 bauð hún sig fram til forseta Íslands. Hún er rekstrarhagfræðingur, frumkvöðull og alþjóðlegur fyrirlesari sem trúir að hugrekkið sé til alls fyrst.

Bókin verður til sölu í Hannesarholti á kynningarverði Sölku 6.990 kr.


Hugrekki í hádeginu með Höllu Tómasdóttur

Viðfangsefni sýningarinnar er að mestu tengt vötnum hér á landi, sjó, stöðuvötnum, tjörnum eða ám og lækjum. Vatnið sem undirstaða alls lífs hér á jörð. Lómur syndir með unga á kyrrlátu vatninu og jaðrakan veður í ró sinni og buslar. Smágerð maríuerla speglar sig í polli á meðan kríurnar leika sér og daðra hátt yfir Tjörninni. Bjarthegri, eftirlætis flækingsfuglinn er sem fyrr á ferð við vötnin. Annar á heimleið til Hegraness með viðkomu í vörmum læk, á meðan hinn sér sjálfan sig á spegilsléttu heiðarvatni einhvers staðar upp til heiða. Gróður jarðar er einnig ríkjandi á sýningunni, einkum sá sem vex villtur við vötnin. Þrjú óhlutbundin málverk eru á sýningunni sem rugla vel upp í ,,rýminu”. Öll málverkin eru unnin með olíu á striga utan myndin af Heklu og þau óhlutbundnu sem gerð eru með akríllitum á striga.  

Myndlistarnám hefur Inga sótt í Englandi 1989 National Diploma Found. Higher Ed. Art and Design. London, og 1988 Hull College of Further Ed. A Level Art. England. Síðar sumarönn í Frakklandi 1993 École des BeauxArts –París auk fjölmargra námskeiða á Íslandi t.d. við Myndlistaskólann í Reykjavík, Myndlistarskóla Kópavogs og Listabraut FB. Annað myndlistartengt nám er BA próf í sagnfræði og listasögu frá Háskóla Íslands 2010 og var viðfangsefni lokaritgerðar hennar ,,Brot úr sögu smámynda á Íslandi. Upphaf og endalok 1770-1840” tengt órannsökuðum anga í sögu myndlistar hér á landi. 

Með hléum hefur Inga starfað við listmálun og vinnur hún ýmist við stór óhlutbundin verk til jafns við fígúratívar myndir. Einkum eru það andlitsmyndir/portret með áherslu á raunsæi sem hafa verið megin viðfangsefni undnfarin ár. Sýningin er aðgengileg á opnunartímum Hannesarholts frá 11:30-16:00 alla daga nema sunnudaga og mánudaga og stendur til 20.september. Allar myndirnar á sýningunni eru til sölu. 

Exotísk tónlist frá Brasilínu, Argentínu, Frakklandi og öðrum ímynduðum lendum leikin af engum öðrum en Hilmari Jenssyni á gítar, Olivier Manoury á bandoneon og Nicolasi Moreaux á kontrabassa.

Á tónleikum EXOTIC MUSIC heyrum við verk sem flest eru sjaldheyrð á djasstónleikum, en um leið er djassinn tónmálið sem tónlistarmennirnir þrír nota til að spila af fingrum fram.
Verkin eftir Olivier eru flest samin fyrir kvikmyndir en Nicolas kemur hér einnig fram sem tónskáld. Hilmar og Nicolas eru tengdari djassheiminum en Olivier frekar tangó og latnesk-amerískri tónlist. Þeir bjóða upp á ævintýraferð til ímyndaðra tónlistarlanda, stíllinn er ekki fyrirfram ákveðinn og stemning augnabliksins ræður ferðinni.

Olivier Manoury, bandóneonleikari (f. 1953) er löngu kunnur hér á landi og í Evrópu sem bandóneonleikari, tónskáld og útsetjari. Hann hefur samið tónlist fyrir kvikmyndir, leikhús og danssýningar, spilað inn á fjölda geisladiska auk þess að leika á tónleikum og tónlistarhátíðum í Evrópu, Suður-Ameríku og Asíu. Olivier hefur spilað á Íslandi í meira en 30 ár m.a. með hljómsveitinni Le Grand Tango ásamt Eddu Erlendsdóttur, Auði Hafsteinsdóttur, Geirþrúði Ásu Guðjónsdóttur, Þórunni Ósk Marínósdóttur, Bryndísi Höllu Gylfadóttur og Richard Korn. Hann hefur einnig spilað með með Agli Ólafssyni, Tómasi R. Einarssyni, Kjartani Valdemarssyni og Kordo strengjakvartettinum.

Hilmar Jensson, gítar (f 1966) er einn fremsti djassgítarleikari Íslands. Hann stundaði nám við FIH tónlistarskólann á Íslandi frá 1982 og síðan frá 1991 í Berklee College of Music í Boston. Hann hefur komið fram og hljóðritað í fjölmörgum útsetningum og upptökum á yfir 50 hljómplötum. Hann hefur spilað í 35 löndum með tríói sínu "TYFT", AlasNoAxis frá Jim Black, MadLove frá Trevor Dunn, Mogil, Outhouse, BMX og fleiri. Hann er einn af stofnendum Kitchen Motors, íslenskrar plötu-útgáfu, hugveitu og listasamtaka.

Nicolas Moreau, kontrabassaleikari, (f 1973) hefur verið eftirsóttur bassaleikari í París í mörg ár. Góð þekking hans á djassmenningu og verkum er ástæðan fyrir því að hann er valinn til þess spila með hinum ýmsu hljómsveitum og einleikurum. (Tigran Hamasyan, Jeff Ballard, Chris Cheek, Jorge Rossy, Baptiste Trotignon, Bill McHenry, Jeremy Udden. Robert Stillman, Dan Tepfer, Pedro Martins). Nicolas er einnig tónskáld og hefur gefið út þrjár plötur með hljómsveit sinni í París. Hann býr nú og starfar á Íslandi.

Exotísk tónlist frá Brasilíu, Argentínu, Frakklandi og öðrum ímynduðum löndum

Hinn landsþekkti uppistandari Valdimar Sverrisson ætlar ..., ha hvað segiði? Hafið þið aldrei heyrt af honum? Jæja, þá fáið þið kjörið tækifæri til að kynnast honum því hann ætlar að vera með styrktarsýningu fyrir Grensásdeild Landspítalans. Já, hann hefur verið með styrktarsýningu áður og það er honum bæði ljúft og skylt að endurtaka leikinn þann 10. ágúst næstkomandi. Og í þetta sinn stendur til að safna kr. 700.000 fyrir sérstöku sjúkrarúmi.

Valdimar greindist með góðkynja heilaæxli sem var fjarlægt með þeim afleiðingum að hann missti sjónina og dvaldi um tíma á Grensásdeild Landspítalans. Þar tók hann þá ákvörðun að láta gamlan draum rætast og hefja uppistandsferil.

Á sýningunni mun Valdimar fara með uppistand auk þess að sýna vel valin grínmyndbönd og lokaatriðið verður frumsýning á örmyndinni:

EINU SINNI VAR Í REYKJAVÍK (Ástar-gaman-drama).
Allur ágóði af sýningunni rennur óskertur til Grensásdeildar LSH.

Valdimar mun einnig hlaupa 10 km. til styrktar Grensás þann 19. ágúst nk.

https://www.rmi.is/hla.../hlauparar/7768-valdimar-sverrisson

Nýjar myndir 2023 – Hjörtur Hjartarson

Þessi einkasýning endurspeglar margar stórar upplifanir listamannsins á árinu 2023, einskonar dagbók.

Í byrjun árs fór hann í fyrsta sinn til Afríku, eitthvað sem hann hafði dreymt um síðan hann var ungur drengur. Í safaríferðinni í „Masai Mara“ þjóðgarðinum í Kenýa varð hann fyrir miklum áhrifum af fegurð sléttanna, víðáttunnar, birtunnar, trágróðursins og rauðbrúna jarðvegsins í Afríku. Allt þetta smýgur síðan hljóðlega inn í listsköpun hans á árinu.

Hann fór líka s.l. vetur á sýninguna „Monet og Mitchell“ í Louis Vuitton safninu í París sem hafði mjög sterk áhrif á hann.

Hjörtur lítur á list sína og þá list sem hann sækir í að hún sé eins og blóm til áhorfandans og að áhorfandinn með upplifun sinni sé eins og býflugan sem fær hunang sitt að launum fyrir huga og sál.

Þetta ár hefur jógaiðkun hans líka aukist og hefur tónheilunin í tímunum þar gefið honum aukið rými fyrir listsköpunina.

Hughrif hvers dags fyrir sig koma beint fram í verkunum hans s.s. að fanga fegurðina í allri sinni dýrð.

Sýningin er opin í Hannesarholti frá 10. – 31.ágúst 2023

This private exhibition reflects many big  experiences in the artist‘s life in the year of 2023, just like a diary.

In the beginning of the year he went on his first time to Africa, something that he had dreamt about since he was a little boy. He was blown away the the beauty on the safari trip in „Masai Mara“ National Park in Kenya by the beauty of the scenery: the plains, the wildness, the brightness, the vegetation and the red soil of Africa. All those things slip quietly into his art work of this year.

He also visited an exhibition „Monet and Michell“ in the Louis Vuitton Musem in Paris, which inspired him immensely.

Hjörtur sees art like a flower for the audience and the audience is like a bee sucking honey as a reward for the mind and soul.

This year his yoga practice has also increased and the tone healing in the classes have created an extra space in his artistics creations.

The impressions of each day are directly expressed in Hjörtur‘s art, such as capturing the beauty in all its glory.

The exhibit is open in Hannesarholt from August 10th to 31st 2023

Þröstur fæddist á Seyðisfirði árið 1966 og ólst þar upp í stórum og samheldnum systkinahópi. Hann bjó í Reykjavík frá framhaldsskólaaldri þar til hann ásamt fjölskyldu sinni tók föggur sínar og flutti til Osló árið 2009.

Hann hefur verið ljósmyndaáhugamaður frá unga aldri en síðasta áratug hefur áhugamálið fengið nýtt líf. Það hefur þróast úr hreinni tækjadellu í áhuga á heildarferlinu, frá ljósmyndun og myndbyggingu til eftirvinnslu ásamt tilraunastarfsemi með óhefðbundnar aðferðum við framsetningu.

Þröstur er sérfræðingur í gagnanetstækni og netöryggi og hefur unnið sem ráðgjafi og lausnaarkitekt i tengslum við krítískan iðnað eftir að hann flutti til Noregs og annasamur hversdagur hefur valdið að lítill tími hefur verið fyrir áhugamálið.

En, sem þáttakandi í stórum alþjóðlegum verkefnum hafa vinnutengd ferðalög til margra landa og heimsálfa verið hluti af starfinu og þá hefur myndavélin verið tekin með sem blés lífi í áhugamálið eftir áratuga dvala.

Helsta áhugamál fjölskyldunnar eru ferðalög sem varð til að ferðafyrirtækið Obeo Travel var stofnað 2016, sem meðal annars selur ferðir til Afríku undir vörumerkinu Obeo Afríka.
Segja má að rekstur fjölskyldufyrirtækisins og áhugamálið ásamt vinnutengdum ferðum passi sem hönd í hanska og gefið tækifæri til ferðalaga og ljósmyndunnar.

Myndirnar á sýningunni eru teknar á ferðalögum um sunnanverða Afríku skipulagðar af Obeo Afríku.

Myndirnar eru prentaðar á hágæða ljósmyndapappír med „pigment“ bleki sem skal halda lit og skerpu í árhundruði. Myndirnar eru límdar á MDF plötu og húðaðar med Epoxy sem hefur í sér vörn fyrir útfjólubláu ljósi. Aðferðin kallar fram skerpu og liti, gefur myndunum fágað yfirbragð en á sama tíma ófullkomna áferð sem undirstrikar að um handverk er að ræða.

Andlit Afríku - Ljósmyndasýning Þrastar Eiríkssonar

Syngjum saman í Hannesarholti laugardaginn 10.júní kl.14 með Björgu Birgisdóttur og Jóni Elíssyni. Textar á tjaldi svo allir geti tekið undir, ungir sem aldnir.

Björg Birgisdóttir hóf Söngnám við söngskólann Domus Vox, lauk einsöngvaraprófi við Söngskólann í Reykjavík, og eftir einn vetur við Söngskóla Sigurðar Demetz tók við framhaldsnám í Vínarborg. Björg hefur komið fram sem söngkona við ýmis tækifæri, bæði hérlendis og víðar í Evrópu.

Jón Elísson lærði píanóleik hjá Guðrúnu Frímannsdóttur við Tónmenntaskóla Reykjavíkur. Hann hefur spilað með fjölda hljómsveita og tónlistarmanna víða um heim.

Björg og Jón starfa nú saman í Sönghúsi Domus Vox hjá Margréti Pálmadóttur og njóta þess að miðla til upprennandi nýs tónlistarfólks.

Veitingahúsið í Hannesarholti er opið frá kl.11.30-16.00

Syngjum saman í Hannesarholti með Björgu Birgisdóttur og Jóni Elíssyni

Að fjallabaki nefnist málverkasýning Sigrúnar Harðar sem opnar í Hannesarholti laugardaginn 3.júní kl.14. Sýningin er sölusýning og stendur til og með 17.júní.  

Sigrún útkskrifaðist úr grafíkdeild Myndlista-og handíðaskóla Íslands 1982, stundaði framhdlsnám í myndlist við Rijksakademie van Beeldende Kunsten í Amsterdam 1982-1986 og útskrifaðist með MA í margmiðlunarhönnun með áherslu á gagnvirkar innsetningar frá UQAM háskólanum í Montreal í Kanada 2005. 

Sigrún vinnur í mismunandi miðla, en hér kynnir hún málverk á striga frá síðustu árum. Verk þessi eru innblásin af íslenskri náttúru, skófum, mosa, berjalyngi, haustlaufi ofl.

Sýningin er opin á opnunartíma Hannesarholts 11.30-16.00 alla daga nema sunnudaga og mánudaga. Undantekning er síðasti sýningardagur, 17.júní, þá er Hannesarholt opið frá 13.00-16.00.

Að fjallabaki - Sigrún Harðar Myndlistarsýning

Syngjum saman í Hannesarholti verður í öruggum höndum Hörpu Þorvaldsdóttur tónlistarkonu og tónmenntakennara laugardaginn 20.maí kl.14. Harpa hefur brennandi áhuga á almennri söngiðkun og leiðir nemendur sína í Laugarnesskóla reglulega í samsöng á sal og hlúir einnig að söngiðkun eldri borgara í hverfinu sínu. Auk þess er hún á kafi í tónlistarsköpun og flutningi með hljómsveitinni Brek. 

Leiðum saman kynslóðirnar í söng og ræktum menningararfinn. Textar á tjaldi til að allir geti sungið með. Aðgangseyrir ókeypis. 

Syngjum saman í Hannesarholti með Hörpu Þorvalds

Úlfur Eldjárn sest við flygilinn í Hannesarholti, þar sem hann mun blanda saman píanóleik og raftónlist á einstakan hátt. Úlfur notar tölvu og hljóðgervla til að víkka út náttúrulegan hljóðheim píanósins, með því að lúppa hann og meðhöndla í rauntíma.

Tónleikarnir eru ferðalag um hina ýmsu hljóðheima þar sem píanóið er uppsprettan. Tónlistin spannar allt frá einföldum laglínum yfir í marglaga draumkenndan og verða tónleikarnir einstök upplifun þar sem áhorfendum gefst tækifæri til að upplifa í návígi einstakan hljóm Steinwayflygilsins í bland við alltumlykjandi hljóðheim sem er skapaður á staðnum. Unnendur mínímalískrar píanó- og ambient tónlistar ættu ekki að láta þessa tónleika framhjá sér fara.

Úlfur Eldjárn er tónskáld, hljóðfæraleikari og raftónlistarmaður og hefur samið og framleitt tónlist fyrir kvikmyndir, sjónvarpsþætti og leikhús auk eigin verkefna þar sem hann fer gjarnan ótroðnar slóðir, m.a. í gagnvirku verkunum Strengjakvartettinn endalausa (2015) og Reykjavík GPS (2019). Úlfur gerir auk þess raftónlist undir nafninu Aristókrasía og er meðlimur í hinum goðsagnakennda Apparat Organ Quartet.

Úlfur Eldjárn will perform on the grand piano in Hannesarholt, where he’ll offer a unique mix of piano playing and electronic music. Úlfur uses a laptop and pedals to live loop and process piano in real time, creating an augmented world of sound where the natural sound of the piano is the main source. The musical journey chronicles newly composed music, ranging from simple minimalist piano tunes, to multi-layered ambient sound collages created in realtime. Lovers of minimalist piano and ambient music should not miss this one.

Úlfur Eldjárn is a composer, multi-instrumentlist and erelctronic musician, who’s written and produced music for films, TV and theatre. Úlfur has released several solo albums and interactive music compositions such as ‘The Infinite String Quartet’ (2025) and ‘Reykjavík GPS’ (2019) where the listener can influence the outcome of the music. Úlfur also creates electronic music under the name Aristókrasía and is a member of Apparat Organ Quartet. Sýna minna

Málverkasýningin SÖNGVAMYNDIR verður opnuð í Hannesarholti 13. maí næstkomandi  kl. 15:00.  Á henni eru tólf málverk eftir Þorstein Eggertsson, gerð eftir söngtextum sem hann hefur samið; Er hann birtist, Fagrar vatnadísir, Fjólublátt ljós við barinn, Gvendur á Eyrinni, Harðsnúna Hanna, Heim í Búðardal, Himinn og jörð, Mamma grét, Ólsen Ólsen, Rabbarbara-Rúna, Það blanda allir landa upp til Stranda og Þrjú tonn af sandi.  Flestar myndanna verða til sölu.  Áður en sýningin hefst; kl. 14:00, munu hjónin Margrét Pálsdóttir og Ársæll Másson stjórna fjöldasöng þar sem hluti áðurnefndra söngtexta verða á efnisskránni. Frítt inn.

Veitingahúsið er opið frá 11.30-16.00.


Söngvamyndir - Myndlistarsýning Þorsteins Eggertssonar

Margrét Pálsdóttir og Ársæll Másson fá gesti Hannesarholts til að syngja með sér lög við nokkra af þeim fjölmörgu textum sem Þorsteinn Eggertsson hefur samið. Eftir samsönginn opnar Þorsteinn sýningu með málverkum sem bera nöfn textanna sem sungnir verða.

Ársæll og Margrét fást mikið við tónlist og hafa víða komið fram, bæði saman, hvort í sínu lagi og með ýmsum sönghópum og hljómsveitum. Þau hafa mikið dálæti á textum Þorsteins og kunna vel að meta glettnina og léttleikann sem einkennir þá marga. Sérstakur gestur verður Jóhanna Fjóla Ólafsdóttir. Textar á tjaldi svo allir geti sungið með. Aðgangur ókeypis.

Syngjum saman í Hannesarholti með Margréti og Ársæli

Gérard Lemarquis og Les Métèques - Kvöldstund með Brassens

Silkikettirnir útgáfutónleikar

Dúótónleikar Sara Su Jones og Tatyana Stepanova

Tíu ár í Draumalandinu - Kvöldstund með Roberto Luigi Pagani

Kyrrð útgáfutónleikar

Syngjum saman í Hannesarholti með Systrum

SAMFÉLAGSGÆSKA í Hannesarholti með Dr. Ólafi Þór Ævarssyni

Náttúra / Að vera - Margrét Jónsdóttir Málverkasýning

Hugrekki í hádeginu með Höllu Tómasdóttur

Ingibjörg Dalberg - Við vötnin

Exotísk tónlist frá Brasilíu, Argentínu, Frakklandi og öðrum ímynduðum löndum

Uppistandssýning fyrir Grensás

Hjörtur Hjartarson - 2023 Nýjar myndir

Andlit Afríku - Ljósmyndasýning Þrastar Eiríkssonar

Syngjum saman í Hannesarholti með Björgu Birgisdóttur og Jóni Elíssyni

Að fjallabaki - Sigrún Harðar Myndlistarsýning

Syngjum saman í Hannesarholti með Hörpu Þorvalds

Úlfur Eldjárn í Hannesarholti

Söngvamyndir - Myndlistarsýning Þorsteins Eggertssonar

Syngjum saman í Hannesarholti með Margréti og Ársæli