Sveinn Einarsson hefur verið í fremstu röð íslenskra leikhúsmanna í hálfa öld, þó að hann hafi kannski haft hægar um sig hin síðari ár nema í skriftum. Hann er leikstjóri, leikhúsfræðingur og hefur verið leikhússtjóri beggja stóru leikhúsanna svo og leitt  innlenda dagskrárgerð Sjónvarps, auk ýmissa annarra starfa. Sveinn hefur gengt margvíslegum trúnaðarstörfum í menningar-og listageiranum jafnt á innlendum vettvangi sem erlendum og hlotið margvíslegar viðurkenningar fyrir leikstjórn.

Frá Sveini hafa komið fimmtán bækur, flestar um leiklistarmál. Í þeirri nýjustu, Íslensk leiklist III, sem hann segir frá í Hannesarholti, er fjallað um íslenska leiklist á árunum 1920-1960, þar á meðal frá opnun Þjóðleikhússins, deilum á þriðja áratugnum og glæsilegu tímabili í sögu Leikfélags Reykjavíkur og munu margar þær sýningar sem sagt er frá vera hinum eldri í fersku minni. Þá segir frá blómlegu starfi áhugamanna, þar sem margt fróðlegt hefur nýlega verið grafið fram, meðal annars hvílíkur fjöldi leikrita hefur verið saminn á Íslandi og hvílík aðsókn hefur löngum verið að leiksýningum á Íslandi þannig að slíks eru fá dæmi í Evrópu.